Олимпиадаға Абай атындағы Қазақ Ұлттық педагогикалық университеті, Е.А. Бөкетов атындағы Қарағанды мемлекеттік университеті, Қ.Жұбанов атындағы Ақтөбе өңірлік мемлекеттік университеті, Ы.Алтынсарин атындағы Арқалық мемлекеттік педагогикалық институты, Алматы университеті және Маңғыстау гуманитарлық колледжінде "Бастауыш педагогикасы" мамандығында оқитын 200-ге жуық білім алушы белсенді түрде қатысты.

Олимпиада жоғары деңгейде өтіп, 121 студент І,ІІ,ІІІ дәрежелі дипломмен марапатталды. Олардың ішінде ең жоғары ұпай алған 6 студент "Қазақстан үміті" төсбелгісімен марапатталды.

Олимпиада жүлдегерлерінің тізімін осы сілтемеден көре аласыз.

Олимпиаданың марапаттау рәсімі Алматы қаласындағы Абай атындағы ҚазҰПУ математика, физика және информатика институтының акт залында өткізілді. Шараға Qaztest.kz орталығының директоры Берікбол Төлеген қатысып, жеңімпаз студенттерді дипломмен және "Қазақстан үміті" төсбелгісімен марапаттады.

Олимпиаданың өтуіне мұрындық болған Абай атындағы Қазақ ұлттық педагогикалық университеті Бастауышта оқыту педагогикасы мен әдістемесі кафедрасының меңгерушісі, п.ғ.д., профессор Жұмабаева Әзия Елеупанқызы олимпиаданың студенттер білімін тексеруге өз көмегін тигізіп, өз мамандығының болашақ үздіктерін анықтауға септігін тигізгенін айтты.

- Бастауыш педагогикасының қалыптасуына зор еңбек сіңірген профессор Ромсейт Мұхамеджанұлы Қоянбаевтың есімі мен шығармашылығын насихаттайтын шаралар университетімізде жиі өтіп тұрады. Ғалым ұстазымыздың 85 жылдығына орай алғаш рет студенттер арасында "Жас Қоянбаевтанушы" олимпиадасын Qaztest.kz сайтымен бірлесе отырып өткіздік. Осындай олимпиадаларды өткізуді дәстүрге айналдыруымыз керек,- деді Әзия Елеупанқызы. 

Qaztest.kz олимпиада ұйымдастыру комитеті