Білім және Ғылым министрі Асхат Аймағамбетов мырза орталық коммуникация орталығында өткен онлайн брифингте көпшілікті толғандырған сұраққа жауап берді.

- Мен сөзімді контексттен жұлып беруге қарсымын. Біз не айтып жатырмыз, мәселе не жайында дұрыс түсінуіміз керек. Біз нені меңзеп тұрмыз? Біз тек мектеп қабырғаларында өтетін олимпиадалар мен марапаттар ақылы болмауы тиістігін айттық. Мектеп ақылы олимпиадалар ұйымдастыра алмайды. Сонымен қатар, көптеген қоғамдық және интернетте өтетін көптеген олимпиадалар бар. Біз оларға шектеу қоймаймыз және ондай мақсатымыз да жоқ. Барлық оқушылар мен ұстаздар бос уақытында ақылы олимпиадаларға қатыса алады. Ол заңсыз емес. Біз тек мектептерде үшінші бір қоғамдық бірлестікпен немесе жеке кәсіпкерлердің олимпиада өткізіп, оқушылардан ақша жинауы жайында сөз қозғадық. Бұл заңсыз. Біздің айтқымыз келгені осы ғана. Ал олимпиадаларға келер болсақ, ол жайлы бірінші рет айтып отырғанымыз жоқ. ҚР БҒМ-нің бұл саланы реттейтін бұйрық бар. Бұл ешқандай жаңа сұрақ емес. Барлық жұмыстар қолданыстағы нормалар негізінде бұрынғыдай жүргізіле береді,- деді министр Асхат Аймағамбетов.

Өздеріңіз байқағандай журналистер мен баспасөз қызметі ақпарат таратуда министрдің сөзінің бір бөлігін ғана жұлып алып жалпы онлайн олимпиадаларға бағытталған жалған ақпарат таратып жіберді. Кейінгі жарияланған ақпараттарында «Кейбір жеке тұлғалар педагогтарға арналған наградаларды жасап, оларды оңды-солды сатып жатыр. Күмәнді ақылы конкурстарға қатысу нәтижесінде алынған наградалар мен дипломдар педагогтерді аттестаттаудан өткізу кезінде ескерілмейді» деп  хабарлады.

Өздеріңіз байқағандай біз ұйымдастырып отырған олимпиадаларымыз ешқандай «күмәнді байқауға» жатпайды. Біз ашық түрде қатысушылардың нәтижесіне қарай марапаттарды үлестіреміз. Осы уақыт аралығына дейін біздің тарапымыздан бір де бір марапат сату болған емес.

Министрліктің де әділеттілікті қалайтындығын түсінеміз. Сол себепті, жаңа оқу жылындағы жеңімпаздарға марапаттарды үлестіруде IP арқылы қатаң сүзгіден өткізіп, жеңімпаздарды анықтауда критерийлерді күшейтуді қолға алатын боламыз.

Жоғарыдағы сұрақтарға қайта жауап берер болсақ, Qaztest олимпиадалары ҚР заң нормалары шеңберінде әрекет етеді. Қазақстан Республикасында педагогикалық қызметкерлерді аттестаттау бүгінгі күні Қазақстан Республикасы Білім және ғылым министрінің бұйрықтары негізінде жүзеге асырылады. Qaztest марапаттары "педагог-модератор", "педагог-сарапшы", "педагог-зерттеуші" біліктілік санаттарына аттестаттау кезінде пайдаланылуы мүмкін. Аттестаттауға құжаттарды қабылдаудан бас тартудың заңды негізі жоқ.

Құрметпен, Qaztest.kz сайты