22 желтоқсан күні Білім және Ғылым министрлігінің аппараттық кеңесі өтіп, сатып алынатын наградалар мен ақылы олимпиадалар туралы мәселе қозғалды. Осы ретте білім саласында қызмет көрсетіп жатқан ұйым ретінде Qaztest.kz олимпиада ұйымдастырушылары (Құрылтайшысы Skills academy жауапкершілігі шектеулі серіктестігі) атынан мәлімдеме жасағымыз келеді.

Министр А.Аймағамбетов мырза қоғамдағы талқыға түсіп тұрған мәселені көтерді. Бүгінгі күні орден, медальдардың саудаланып жатқаны жасырын емес. Әртүрлі байқауларды ұйымдастырып, жұмыстары тексерілмей-ақ барлығына дипломдар таратылатындығын осыған дейінгі отырыстарда да сынап, байқаулардың мазмұнын арттыруды тапсырған еді.

Министр өз сөзінде олимпиада марапаттарының сатылмауын, академиялық адалдықтың сақталуын және тегін өтуін талап етті. Осы талаптарға біздің олимпиадаларымыз сай келе ме, келмей ме біз жауап береміз.

Марапаттар сатылмайды

Qaztest.kz олимпиада сайты 2017 жылдан бері жұмыс жасап келеді. Осы уақыт аралығында ұйымдастырушылар тарапынан олимпиадалардың ешбір марапаты, дәрежелі дипломдарының сатылуы тіркелген жоқ. Оны біз сенімділікпен айта аламыз. Ол туралы біздің олимпиадаларымызға қатысушылар да растайды деп ойлаймын. (Өкінішке орай, біздің олимпиадаларымызға қатысы жоқ жеке педагогтар Qaztest олимпиадаларынан орын алып беремін деп ақпарат таратқандары соңғы олимпиадаларда байқалды. Біз оларға тосқауыл қою үшін соңғы олимпиадалардың нәтижесін шығаруда құрылғының IP адресі арқылы тексеру жүйесін іске қостық. Яғни, бір құрылғыдан санаулы адамдар ғана тесттен өтуі тиіс).

Qaztest.kz олимпиадаларының марапаттары сатылмайды. Қатысушылар қатысу жарнасын төлеп, өз нәтижелеріне қарай марапат алады. Сонымен қатар, Республика бойынша екі кезеңдік олимпиадада ең жоғары ұпай алған педагогтерімізге атаулы төсбелгілер тағайындадық. Қазан айында өткен «Үздік педагог» олимпиадасы мұғалімдердің арасында өте жақсы сұранысқа ие болды.

Академиялық адалдық сақталады

Біздің олимпиадаларымызға қатысушылар жеке тіркеліп немесе координатордың тіркеуімен қатыса алады. Тесттің күрделілік деңгейіне байланысты 40, 50, 60 минут уақыт беріледі. Белгіленген уақыт ішінде қатысушы тестті белгілемеген жағдайда тест аяқталып қалады.

Олимпиада сұрақтарын дайындауда жас ерекшелігі ескеріліп, мектеп бағдарламасы бойынша сұрақтар әзірленеді. Ал педагогикалық олимпиадалардың жоғары деңгейдегі тапсырмаларын ЖОО-ның оқытушылары дайындайды. Осы ретте Qaztest.kz сайты 2018 жылы Абай атындағы Қазақ ұлттық педагогикалық университетімен меморандум жасасты.

Бізді ешкім қаржыландырмайды

Министр А. Аймағамбетов мырза олимпиадаларды тегін өткізуді ұсынды. Біздің мекеме қатысушылардың жарнасы арқылы жұмысын жүргізіп келеді. Осы уақыт аралығында мемлекеттен не басқа да ұйымдардан қаржыландырулар болған жоқ.

Еліміздегі онлайн олимпиадада сапалы қызмет көрсетіп келе жатқан cdo.kz, daryn.kz, qaztest.kz, daryn.online және т.б сайттардың барлығы ақылы негізде өз қызметін ұсынып келеді. Егер ақылы олимпиадаларды тегін өткізу мәселесі ұсынылса, біз өз қызметкерлеріміздің жалақысы мен әкімшілік шығындарымызды өтеуге мүмкіншілігіміз болмайды және өз жұмысымызды тоқтатуға тура келеді.  

Министрлік тегін платформаларды жасауды қолға алған жағдайдың өзінде ол мекеменің жұмысын қаржыландыратындығы белгілі. Бұл ретте нарықтағы бәсекелестікті арттыру үшін және жемқорлықты жою үшін жеке меншік ұйымдардың да жұмыс жасауы тиіс.

Қорыта келгенде, қанша жылдан бері жүйелі түрде жұмыс жасап келе жатқан Qaztest.kz сайтының олимпиадалары толық талапқа сай келетіндігін жеткізгіміз келеді. Осы уақытқа дейін тұлғатануда А. Байтұрсынұлы, Е. Бекмаханов, А. Құнанбайұлының шығармашылығы мен өмірін насихаттайтын, оқушылардың таным көкжиегін кеңейтетін «Жас интеллектуал», «Жас математик», ескеріле бермейтін тәрбиешілерге арнап «Үздік тәрбиеші», педагогикалық өмірге енді аяқ басқан мамандарға арнап «Жас маман» сынды олимпиадаларды жоғары деңгейде өткізіп келеміз. Бұл олимпиадалар жыл сайын ұйымдастырылып, дәстүрлі түрде өткізілуде.  Бірнеше жыл бұрын ҚР БҒМ-нің 2018 жылы 24 мамырындағы №226 бұйрығы шығарылып, аттестацияда жарамды олимпиадалар тізіміне біздің мекеме сайттары 257-реттік нөмірімен тіркелген болатын. Кейін бұл бұйрық өз күшін жойды және осы уақытқа дейін жаңа бұйрық шығарылған жоқ. Сол себепті біз өз жұмысымызды жалғастырудамыз.

Осы ретте министр Асхат Аймағамбетов мырзаға екінші бір тарап ұйымдастырушылардың құқығы мен атқарған жұмыстарын ескеріп, аттестацияға жарамды байқаулар мен олимпиадалардың тізімін жасауды  ұсынамыз. 

Ал қатысушыларымызға біздің инстаграм әлеуметтік желісіне жариялаған постымызға өз пікірлеріңізді қалдыруларыңызды сұраймын. 

Пост сілтемесі: Постты оқу 

Құрметпен, Qaztest.kz олимпиада ұйымдастыру комитеті